almennur pirringur.

2003-05-24T15:32:00.000Z

jájá
Það er margt og mikið búið að gerast hjá mér að undanförnu. Ég náði blessaða þýskuprófinu þannig að ég útskrifast á réttum tíma. Svo er pabbi farinn til Ameríku að leita að vinnu loksins. Þannig að það er ýmislegt í gangi hér.
Með ástarkveðju, eymd og volæði. Grétar

2003-05-23T01:12:00.000Z

rök versus rökleysa, hver vinnur?
(a+b-c)/z þess vegna er kindin rauð og mun deyja úr mæðuveiki.

2003-05-21T20:27:00.000Z

Vandamál
Númer eitt er að gera sér grein fyrir vandamálinu.
Númer tvö er að búa sér til einhvern algorytma sem virkar.
Númer þrjú er að implementera algorytmann.
Númer fjögur er að renna í gegnum algorytmann með einhverjum breytum til að athuga hvort ekki sé allt með feldu og laga ef það þarf.

Svona getur lífið verið Kartesíst.

Hjá mér eru þrú vandamál sem þarfnast lausnar.
Vandamál 1 er nýuppgötvað, það var í dag, og þess vegna er algorytmavinnan enn á frumstigi, en þrátt fyrir að djúpt sé á vandamálinu held ég að algorytminn verði einfaldur.
Vandamál 2 er í implementeringu þrátt fyrir að ýmsir gallar hafi komið í ljós á algorytmanum sem er nú í endurskoðun.
Vandamál 3 er mjög erfitt. Það er enn verið að vinna í algorytmanum og gengur sú vinna hægt. Ýmis óleyst vandamál á sviði líf- og eðlisfræði hafa skotið upp kollinum þrátt fyrir að stærstu óleystu vandamálin þar séu á sviði sál- og málfræðilegs eðlis. Þetta er allt þó í vinnslu og vonandi verður vandamál þrjú leyst á þessu ári, sem og hin.

2003-05-20T23:48:00.000Z

Slæm og ekki slæm mál
Eins og staða mála er núna samkvæmt nýjustu upplýsingum og allt það þá er ég fallinn í tveimur og tæpur í því þriðja. Úff þetta virðist ætla að ganga eitthvað skrykkjótt fyrir sig en ég hef engar áhyggjur þetta hefst allt að lokum. Auk þess er öllum í Petrograd sama þótt ég falli í einhverjum fögum.
p.s. tónelskandi lesendur hafa kannski velt því fyrir sér hvaða undrafögru tónar þetta eru sem nú hljóma í eyrum mér, þeir tóngleggstu hafa kannski giskað á fyrsta píanókonsert Tchaikovskys, ef svo er þá óska ég þeim til hamingju með sigurinn og gæfu í framtíðinni.

2003-05-20T18:37:00.000Z

línudans er ákaflega erfiður hlutur og maður verður að passa sig að detta ekki.

2003-05-19T21:38:00.000Z

djöfull og brennivín.
Ég er búinn að vera drulluveikur í dag og gær og hef þess vegna ekki verið mjög fastur við bækurnar sem er ákveðinn galli þar sem ég er að fara í lesna stærðfræði á miðvikudaginn og má ekki við því að fá lágar einkunnir í þeim prófum sem eftir eru, því þá fell ég á árinu.

2003-05-17T04:00:00.000Z

No sleep and to much coffie makes Grétar a tense boy

2003-05-17T02:19:00.000Z

Know Your Enemy

2003-05-10T19:07:00.000Z

Fordæmingar
Þessir sjálfstæðismenn sem eru alltaf að njósna á kjörstað og taka gögn þaðan og annað slíkt.
Bandarískir fréttamenn

2003-05-10T01:13:00.000Z

...and to all you nazis out there I say sieg help.

2003-05-09T20:47:00.000Z

Fordæmingar
Ég fordæmi Elísabetu Jökulsdóttir fyrir það að þykjast vera alveg rosalegur umhverfissinni, og þar með sverta nafn okkar vegna þess að hún er svo vitlaus og kemur svo illa furir, en kemur síðan fram og hvetur fólk til að kjósa Ingibjörgu Sólrúnu vegna þess að hún er kona. ISG stóð fyrir því að Reykjavíkurborg samþykkti fjárveitingar, og hennar flokkur samþykkti Kárahnjúkana á Alþingi. Þetta er ekkert annað en hræsni og hún er hér með fordæmd.

Steríótýpíska karlmenn. Þetta lið hugsar ekki og talar ekki (þá er það innifalið í samræður að þær séu vitrænar). Fordæming.

2003-05-08T22:22:00.000Z

Ég er Tantalos, bjargið mér frá Hadesi.

2003-05-07T20:38:00.001Z

HHmmmm kaffi,aaaaaaaaa

2003-05-07T20:38:00.000Z

Langar nætur
Það er fátt skemmtilegra en að vaka heilu næturnar og læra, pulla all nighter á etta eins og maður hefur heyrt unga fólkið kalla það. Það stefnir einmitt í eina svona vökunótt núna í nótt því ég er að fara í stjörnufræðipróf á morgun og það er ekki lítið efni að lesa. En klukkan 11 á morgun verður ákveðnum áfanga náð vegna þess að þá eru prófin hálfnuð hjá mér, 7 búin 7 eftir.

2003-05-07T00:55:00.000Z

Svefnleysið plagar, svefninn vekur samvisku
Ég er ekki búinn að ná almennilegum svefn í afskaplega marga daga (reyndar nokkur ár ef út í það er farið) og ég er strax byrjaður að uppskera. Ég er kominn með allskyns kæki út um allan líkamann, þó sérstaklega í andliti og maga, sem gera það að verkum að ég er með nær stanslausann hausverk og alltaf með hálfgerða velgju í maganum. Og út af þessum kækjum reynist mér enn erfiðara að sofna þannig að ég er fallinn í einhvern vítahring. En svo kemur það á hinn bóginn að svefninn lætur mig fá samviskubit yfir því að vera ekki að lesa þannig að þetta jafnast nokkurn veginn út. En svo eru stundir eins og þessar þar sem ég er hvorki sofandi né lesandi og þá er ég bæði með andstyggilega kæki og samviskubit. Andskotinn.

2003-05-06T19:05:00.000Z

ótrúlegur andskoti
Flest öll dýr sem hafa verið gerðar tilraunir á sýna skilyrt viðbrögð. Þ.e. ef þú ýtir á þennan takka færðu straum ef þú ýtir á hinn færðu mat. Dýrin læra að forðast strauminn en leita í matinn. En ekki íslendingar. Það er sama hvað ríkisstjórnin gerir á hlut okkar það er alltaf hægt að finna einhver rúm 30% sem eru tilbúin að gleyma það og grafa. Aukið bil milli ríkra og fátækra, nei kýs sjálfstæðisflokkinn. Minni bætur fyrir þurfandi, nei kýs sjálfstæðisflokkinn. Stríð ekki í okkar nafni, nei kýs sjálfstæðisflokkinn. Valdhroki, nei kýs sjálfstæðisflokkinn. Glæpir gegn náttúru, nei kýs sjálfstæðisflokkinn. Íslendingar virðast ekki skilja það að breytingar eru möguleiki. Við þurfum ekki að sætta okkur við hvað sem er.

2003-05-05T23:35:00.000Z

Fordæmingar
aðrir
ég
sumir
allir
flestir

2003-05-05T23:34:00.000Z

Það er búið að vera allt of gott veður í dag fyrir almennilegan próflestur. Ég vona að það komi ekki of mikið niður á einkunn minni í stærðfræðiprófinu sem ég er að fara í á morgun.

2003-05-05T00:14:00.000Z

andskotans próf. 4 búin 10 eftir. eitt á morgun annað hinn.

2003-05-04T18:44:00.000Z

Fordæming
Djöfull fordæmi ég framsóknarflokkinn. Andskotinn hafi það flokkurinn er búinn að vera í stjórn í 26 af síðustu 30 árum ef ég man rétt og núna hljómar hann eins og stjórnarandstöðuflokkur og talar um réttlæti og anað slíkt. Það er mjög einkennilegt að sjá kvótakónginn Halldór Ásgrímsson tala um að það sé réttlætismál að það sé sett í stjórnarskrá að kvótinn sé sameign þjóðarinnar! Það er einnig einkennilegt að sjá Sif Friðleifsdóttir tala um náttúruvern, hún er einhver mesti náttúruböðull sem komið hefur upp á Íslandi. Og svo tala þeir um misrétti kynjana og fátækt og tala um að það sé hræðilegt og því þurfi að breyta en eru svo búnir að vera með félagsmálaráðherra í 8 ár. Ég þoli ekki svona djöfulsins hræsni og ég vona að enginn kjósi þennan andskotans flokk.

2003-05-04T01:11:00.000Z

I´m back
Þrátt fyrir að margir hafi reynt að fá mig til að halda áfram hef ég ákveðið að halda áfram. Það er svo margt sem er að fara í taugarnar á mér um þessar mundir að ég get ekki annað en látið reiðina flæða á netið. Ég ætla með tíð og tíma að laga aðeins lúkkið, henda burt einhverjum linkum og kannski setja aðra í staðinn.

2003-03-04T13:52:00.000Z

ég hef tekið þá ákvörðun að hætta að blogga á þessum stað og einbeita mér að skrifum á glasnost. takk fyrir samveruna

2003-03-02T18:47:00.000Z

Heimska og skilningsleysi.
í fréttum í dag er fjallað um handtöku á þekktum hryðjuverkamanni í Pakistan. Þetta er maður sem talið er að hafi verið einn af helsu skipuleggjendum ódæðisverkanna sem framin voru snemma í septembermánuði 2001. Bandaríkjamenn fagna þessu eðlilega, en á kolröngum forsendum. Þeir ættu að fagna því að glæpmaður hafi verið handtekinn og fái þá makleg málagjöld, en þeir líta ekki svona á málið. bNA kjósa heldur að líta á þetta sem stórt og mikilvægt skref í "baráttunni gegn hryðjuverkum". Hvurslags flónska er það að halda að þú getir gert heiminn öruggari á þann hátt að handtaka glæpamenn en gera ekkert í því að reyna að draga úr þeirri spennu og því hatri sem veldur því að menn grípa til svona verka. Það munu alltaf koma nýjir og nýjir menn sem eru tilbúinir til þess að drepa fólk í stórum stíl á meðan hatrið er til staðar. það er ekki nóg að kroppa arfann það þarf að leita að rótinni.

2003-02-25T22:31:00.000Z

loksins loksins
ég er búinn að redda mér tölvufræðibókinni sem við erum búin að vera að nota í allan vetur. Loksins getur maður farið að kíkja aðeins á Java

2003-02-24T18:43:00.000Z

ég fordæmi
Andy Rooney hjá 60 mín. og aðra þá sem halda uppi þeim heimskulega áróðri að Frakkar og Þjóðverjar séu ekki í aðstöðu til að mótmæla vegna þess að Bandaríkin björguðu þeim frá Nasisma og Kommúnisma. Þetta er einhver sú heimskulegasta og tilætlunarsamasta krafa sem gerð hefur verið á hendur einhverjum. Hverju voru bnA menn þá að bjarga ef þessar þjóðir mega ekki tjá sig og sínar skoðanir.
úff fordæming

2003-02-24T13:59:00.000Z

Tekið af Múrnum.

Á þessum degi árið 1848 leit Kommúnistaávarpið dagsins ljós.

2003-02-24T13:52:00.000Z

djöfull var gott að sofa út í dag og bæta upp fyrir ansi svefnlitla helgi

2003-02-23T15:45:00.000Z

ég var að komast að því mér til mikillar gleði að lynghagabróðirinn hann Snæbjörn bloggar. þannig að ég ætla að lönka á hann

2003-02-23T15:36:00.000Z

NALLINN

Internationalinn : alþjóðasöngur verkalýðsins

Fram, þjáðir menn i þúsund löndum
sem þekkið skortsins glimutök !
Nu bárur frelsis brotna á ströndum
boða kúgun ragnarök
Fúnar stoðir burtu ver brjótum
Bræður! Fylkjum liði i dag !
Ver bárum fjötra, en brátt nú hljótum
að byggja réttlátt þjóðfélag

Þó ad framtíð sé falin,
grípum geirinn i hönd !
Því Internationalinn
mun tengja strönd við strönd

Á hæðum vér ei finnum frelsi,
hjá furstum eða goðaþjóð;
nei, sameinaðir sundrum helsi
og sigrum, því ei skortir móð.
Alls hins stolna aftur vér krefjumst,
ánauð þolir hugur vor trautt,
og sjálfir brátt vér handa hefjumst
og hömrum meðan járn er rautt

Vér erum lagabrögðum beittir
og byrðar vorar þyngdar meir,
en auðmenn ganga gulli skreyttir
og góssi saman raka þeir.
Nú er tími til dirfsku og dáða.
Vér dugum, - þiggjum ekki af náð,
Látum bræður því réttlætið ráða,
svo ríkislög vor verði skráð

Till sigurs, eining öreiganna
með alþýðunnar stolta nafn
Þín jörð er óðal allra manna,
en ekki fyrir gamm né hrafn !
Þeirra kyn skóp þér örbrigð og ótta
en er þeir skuggar hverfa úr sýn
einn vordag snemma á feigðarflötta
mun fegurð lífsins verða þín

Sókn til frelsis er falin
vorri fylkingu í dag
unz Internationalinn
er allra bræðrarlag

2003-02-23T15:32:00.000Z

svo virðist sem ölæði gærkveldsins hafi tekist að smjúga inn á internetið.

2003-02-23T00:11:00.000Z

enn og aftur misskemmtilegar sögur

2003-02-23T00:08:00.000Z

hahahahhahahahahah

2003-02-23T00:07:00.000Z

jájá ég er að hlusta á ýmsar sögur sem eru misskemmtilegar

2003-02-23T00:00:00.000Z

ég fordæmi fólk sem grípur fram í fyrir mig

2003-02-22T23:59:00.000Z

ég er í góðu glasnost partý

2003-02-21T23:45:00.000Z

ég fór í mjög skemmtilegt kaffi í dag. Þannig er mál með vexti að góðvinur minn hann oddur er barnabarn meistara Svavars Gestssonar sem er á landinu núna. Ég, Oddur, Gvendur, Snæbjörn og Einar fórum til hans og ræddum stjórnmál og samfélagsmál. Það var afskaplega áhugavert að tala við einhvern skeleggan vinstrimann sem hefur lifað tímana tvenna. Frekara framhald mun verða á fundum okkar og einnig ætlum við að talast saman í formi tölvupósts. Skemmtilegt það.

2003-02-20T18:16:00.000Z

þeir sem ekki eru að skilja síðasta pósinn hjá mér geta fattað hann her

2003-02-20T17:45:00.000Z

Stefán Einar mun keppa í kvöld fyrir hönd Vessló gegn MH í Gettu Betur. Sem er ekki frásögum færandi nema fyrir þær sakir að hann lítur út eins og sólþurrkaður Björn Bajarnason

2003-02-20T11:48:00.000Z

ég fékk mér banana áðan hann var númer 4011 sem er einmitt 3 sinnum 337

2003-02-20T10:29:00.000Z

gamla tjaningarfrelsid

2003-02-20T10:27:00.000Z

ég byrjaði í gær á því að reyna ða setja saman breut í HÍ ég nenni ekki að taka einhver önnur fög með stærðfræðinni þannig að ég ætla að sníða mér einstaklingsbundna leið sem verður alveg hrein stærðfræði

2003-02-20T10:14:00.000Z

ég er búinn að vera að pæla í því að endurbæta síðuna mína þ.e. linka og slíkt það fyrsta sem ég ætla að gera í þeim málum er að setja link á minn aldavin Gunnar Pal Baldvinsson

2003-02-20T10:09:00.000Z

god grein

2003-02-20T10:04:00.000Z

jájá nú er ég bara að bíða eftir því að ég nenni að standa upp og drulla mér út í Mál og Menningu til þess að kaupa mér stílabók

2003-02-19T21:26:00.000Z

alveg er það magnað hvað sumir eru leiðinlegri en aðrir.

2003-02-19T10:40:00.000Z

Það er mjög skemmtileg grein eftir Katrínu Jakobsdóttir um stefnu vg í friðarmálum. Þetta er góð lesning fyrir alla þá friðarsinna sem ætla að kjósa í vor.

2003-02-19T10:28:00.000Z

her er linkur sem gæti gefið góðar hugmyndir fyrir mótmæli gegn stríðinu í írak ef það hefst.

2003-02-19T10:00:00.000Z

Áhugavert
fyrst BNA vilja endilega ráðast á Írak til að kría út olíu og prófa ný leikföng þá held ég að að sé þess virði að pæla aðeins í hvernig samskiptum BNA manna og Saddams hefur verið háttað eftir að BNA menn komu honum til valda. sja her

2003-02-19T09:51:00.000Z

Það er góð grein á múrnum um imperíalísk fasistasvín og ætla ég að birta hana hér.

Sjúkleg heimsvaldastefna

18.2.2003

Engin takmörk virðast lengur fyrir ofsa Bandaríkjastjórnar í garð þeirra sem ekki vilja stíga með henni stríðsdansinn. Nú síðast berast fregnir af sérstökum refsiaðgerðum gagnvart Þjóðverjum vegna andstöðu þýskra stjórnvalda við árásarstríð gegn Írökum. Ekki þarf fílsminni til að rifja upp hversu þungbrýnn Colin Powell sat undir ræðu Joschka Fischer um það af hverju sá síðarnefndi væri einfaldlega engan veginn sannfærður um réttmæti innrásar eða rök sem færð hefðu verið fyrir hernaði.

Hugmyndir Donalds Rumsfeld um refsingu Þjóðverja eru tvíþættar. Í fyrsta lagi verði allir bandarískir hermenn kallaðir frá Þýskalandi og bandarískur vígbúnaður fluttur þaðan. Þakka skyldi, kynnu margir að segja og ekki er víst að þýskum almenningi verði sérstök eftirsjá í 42.000 manna herliði Bandaríkjanna, skriðdrekum, herflugvélum og fleiru sem því fylgir.

Í öðru lagi talar Rumsfeld fyrir þeim sérkennilegu sjónarmiðum að beita viðskiptaþvingunum til að hegna Þjóðverjum fyrir sjálfstæða stefnu í alþjóðamálum. Ekki er gott að segja hvernig það samrýmist reglum Alþjóðaviðskiptastofnunarinnar (WTO) sem Bandaríkjastjórn hampar svo mjög þegar henni hentar. En það er vert að hafa í huga pólitíkina í hótunum sem þessum. Hvaða lönd önnur sæta einhliða viðskiptaþvingunum af hendi Bandaríkjastjórnar? Þau eru ekki mörg en þar er erkióvinurinn Kúba efst á blaði. Líbýa er væntanlega enn á listanum.

Hvers konar hugarfari lýsir það ef Rumsfeld og félagar telja sig færa um að dæma Þýskaland til útlegðar fyrir það eitt að fylgja ekki harðlínumönnunum í Pentagon að málum? Svarið liggur í yfirlýstu markmiði refsiaðgerðanna enda er það alveg skýrt: Að skaða efnahag Þýskalands.

Kennisetningar kapítalískrar hnattvæðingar, sem Bandaríkin hafa haft forgöngu um í gegnum Alþjóðaviðskiptastofnunina, Alþjóðagjaldeyrissjóðinn og Alþjóðabankann, ganga jafnan út á að alþjóðleg samvinna ríkja aukist, öll samskipti fólks greiðari, opnari landamæri og aukna fríverslun. En þegar á reynir og hagsmunir hinna stóru eru í húfi þá eru andstæður alls þessa sýndar grímulaust. Raunveruleikinn einkennist af heimsvaldastefnu, einangrunar- og útlegðardómum yfir ríkjum og þjóðum, vopnuðu landamæraeftirliti og hækkandi tollum til að skaða þá sem einhverra hluta vegna eru í hinu liðinu þá og þá stundina.
sh

2003-02-18T23:13:00.000Z

ég vil hvetja alla til þessa að reyna að kaupa sem minnst af bandarískum vörum og reyna þannig að tjá andúð sína á stríðinu í írak

2003-02-18T08:31:00.000Z

jájá tekið var vel á því í frusýningarferðinni. Frumsýningin tókst alveg glirandi vel og voru viðtökur úr sal alveg frábærar.

2003-02-16T01:24:00.000Z

mmmmmmmmmm...
það verður ekki tekið af honum Horowitz að hann er einhver besti píanóleikari sögunnar. ég er núna að hlusta á hann spila smá Chopin en svo verður hlustað á hann taka 3. píanókonsertinn hans Rachmaninofs sem er æðislegasta tónverk sögunnar í besta flutning sögunnar

2003-02-16T01:00:00.000Z

Ég fordæmi
George Bush og Tony Blair og alla þeirra kóna
ríkisstjórn íslands fyrir stuðning þeirra við Bandaríska hryðjuverkamenn
það að olía vegi meira en írakst blóð á vogarskálum kapítalismans
öll imperíalísk fasistasvín

2003-02-14T17:36:00.000Z

Ballið í gær gekk stórslysalaust fyrir sig þrátt fyrir að eitthvað hafi verið í fréttum um læti fyrir utan. ég var einnig að frétta að einhverjar stelpur úr MR hefðu lent í harkalegum árekstri í gær. Einhver fullur ökumaður keyrði inn í hliðina á þeim. Þær sluppu sem betur fer allar lítið meiddar, bara beltabrot og annað slíkt. Ég vona að þeim heilsist vel.

2003-02-13T17:57:00.000Z

ég var að koma af hátíðardagskrá FRAMTÍÐARINNAR hún var helvíti fín sérstaklega var hann Þorsteinn Guðmundsson fyndinn, einn af þei betri hátíðarræðumönnum sem ég hef orðið vitni að.

2003-02-13T01:33:00.000Z

bloggari var á subway í dag þegar ónefnt barn ráðherra vatt sér upp að honum og for að spyrja hvers vegna hann væri með allar þessar nælur á frakkanum sínum og hvernig hann nennti þessu. Bloggari kvaðst einungis vera að tjá skoðanir sínar en þá spurði barnið hvernig hann nennti að standa í því að vera að mótmæla og svona því þetta skilaði hvort eð er engum árangri. þarna fannst bloggara ansi mikil lykt af heilaþvotti.

2003-02-11T01:15:00.000Z

ég er ekki búinn að geta sest niður núna í marga daga þannig að ég veit ekkert hvað er í gangi í heiminum

2003-02-07T00:29:00.000Z

núna er helvítis skreytingabaslið komið á fullt en það er svo sem visst fútt í því

2003-02-05T14:06:00.000Z

Mér þykir ansi leiðinlegt að komast ekki á þingpalla á eftir en svona er þetta bara.

2003-02-05T13:29:00.000Z

jájá nú er einn annar andlaus skóladagur búinn. ég svaf helvíti vel í nótt en samt sverfur svefninn að.

2003-02-04T19:34:00.000Z

ég hef alltaf haldið að oddatölurnar væru frekar góðir vinir mínir en nú er ég farinn að halda að þær séu það ekki, sérstaklega ekki lágar tölur eins og 3 eða 5 þó svo að 1 sé mjög góð tala, en þetta gengur kannski hjá.

2003-02-04T12:38:00.000Z

já þetta var víst ansi góður málfundur í gær. Ég því miður misti af honum mestum en fróðir menn og rétt staðsettir segja að þar hafi Stefán Pálsson jarðað Suslinginn Sigurð Kára nokkuð auðveldlega enda engin furða, hann verandi mælskur og réttu megin í þessu máli sem og svo mörgum öðrum

2003-02-04T12:30:00.000Z

Allir verða að fara hingað og skrá sig her

2003-02-04T12:25:00.000Z

ég fordæmi
George Bush og hans stríðsmangara
Tony Blair
Davíð Oddsson
Ingibjörgu Sólrúnu Gísladóttir
Valgerði Sverrisdóttir
Sif Friðleifsdóttir
Sigurð Kára Kristjánsson
Frjálshyggjufífl
rasista

2003-02-04T08:15:00.000Z
ég er núna í tölvufræðitíma núna sem er fínt, 2 tímar á netinu. ég er að fara að viða að mér upplýsingum.

2003-02-02T06:25:00.000Z
úff
ég hef aldrei upplifað annað eins. Bowling For Columbine er sú allra magnaðasta mynd sem ég hef nokkurn tíman séð, ég hvet alla til að sjá hana hún er rosaleg.

2003-02-01T17:59:00.000Z
loksins í kvöld er ég að far að horfa á Bowling for Columbine ég er búinn að bíða lengi eftir því

2003-01-28T23:03:00.000Z
ég fór á mótmælin í dag, það var ekki alveg nógu góð mæting en samt kannski ágætt miðað við það að þetta var í hádeginu. Eftir fundinn fór ég á pallana og hlustaði þar á Álgerði bull og frábær andsvör frá Steingrími J. og Ögmundi.

2003-01-28T00:11:00.000Z
ég vona að allir hugsandi menn mæti á í dag á austurvöll og mótmæli Kárahnjúkavirkjun mótmælin hefjast kl 12:00

2003-01-27T12:08:00.000Z
Andlát
Látinn er Kiddi í Hallanum. Megi hann hvíla í friði. Hann var einn af helstu öðlingum sem ég hef nokkurn tímann kynnst. Hans mun verða sárt saknað af öllum þeim sem kynntust honum, því heiðarlegri og viðkunnanlegri menn finnast ekki oft. Í gegnum erfið veikindi hélt hann samt höfðinu hátt og mætti í Hallann til að selja okkur peppó og kók. Hann unni Hallanum og okkur MR-ingum og oft vorum það við sem héldum honum gangandi þegar hann átti hvað erfiðast. Ég votta að sjálfsögðu öllum aðstandendum hans mína innilegustu samúð og þá sérstaklega Möggu og ég vona að við sem þekktum Kidda látu sjá okkur til Möggu í Hallann og reynum að hughreysta hana.

2003-01-27T00:00:00.000Z
ég kom heim úr ferðinni með Framtíðinni og co í dag það var bara gaman þrátt fyrir að ég hafi slegið sjálfan mig rothöggi með áfengisneyslu frekar snemma

2003-01-24T22:22:00.000Z
úff stíft
ég var að koma heim af rennsli hjá Herranótt. Nú er stefnan fyrir morgundaginn sú að vakna snemma bruna til keflavíkur og taka sat2 koma heim fara í ríkið fara á rennsli koma heim og fara í bað fara svo í ferð með herranótt eða framtíðinni ogogoggog kannski reyna að hitta ræðustrákana eitthvað á milli til þess að brainstorma.

2003-01-24T13:11:00.000Z
jájá ég var á ballinu í gær það var bara mjög gott ball, fyrir utan það að einhver fífl lömdu félaga mína. þetta voru ekki einu sinni MR ingar heldur bara einhver chokko föbbl

2003-01-23T13:52:00.000Z
það runnu á mig...
tvær grímur þegar ég uppgötvaði mér til mikillar skelfingar að það væri kominn nýr Stalín bara öllu stórtækari, hann heitir Bush. Þetta sem hann er að gera í dag minnir mikið á hreinsanir Stalíns frá 34 til 38 þar sem allir sem gætu verið einhver ógn við hann voru drepnir og voru notaðar upplognar sakir til þess. þetta minnir um margt á það hvernig Bush og hans skósveinar ljúga því að þeir hafi sannanir um hitt og þetta til þess að reyna að réttlæta stríð gegn þeim sem gætu verið þeim skeinuhættir. núna er það ekki bara staða BNa sem eru í húfi heldur er það auðurinn, olían. þrátt fyrir að Bush sé engin mannvitbrekka þá mun okkur alltaf stafa ógn af honum meðan hann getur stafað oil.

2003-01-23T13:32:00.000Z
enn einum skóladegi er nú lokið. það er gott

2003-01-22T21:25:00.000Z
naomi klein er snillingur:

Víggirt meginlönd

Naomi Klein er einhver áhrifamesti þjóðfélagsrýnir og pólitískur hugsuður samtímans. Bækur hennar á borð við “No Logo” og “Fences and Windows” hafa haft gríðarleg áhrif innan baráttuhreyfingarinnar gegn alþjóðavæðingu á forsendum fjármagnsins. Greinin sem hér fer á eftir hefur á undanförnum dögum birst í fjölmörgum blöðum vestan hafs og austan. Hún er holl lesning, einkum þeim sem um þessar mundir syngja stækkun Evrópusambandsins lof og prís.

Tja, það hefði getað verið satt. Þetta sagði öldungadeildarþingmaðurinn Hillary Clinton eftir að í ljós kom að í rauninni reyndu fimm pakistanskir karlmenn aldrei að smygla sér inn í Bandaríkin í gegnum Kanada í því skyni að sprengja New York-borg í loft upp á gamlárskvöld. Þeir komu aldrei til Bandaríkjanna, þeir voru ekki hryðjuverkamenn og frásögnin var öll uppspuni manns sem starfar við að falsa vegabréf.

Á meðan leitin að hinum ímynduðu hryðjuverkamönnum lygalaupsins stóð hvað hæst, skellti Clinton skuldinni á Kanada og “eftirlits- og stjórnlaus” landamæri þess. En jafnvel eftir að blekkingarnar komu í ljós féll hún ekki frá ásökunum sínum. Þar sem landamærin að Kanada eru svo gegndræp, útskýrði hún, “hefði blekkingin reynst alltof trúverðug”.

Þetta var með öðrum orðum heppileg blekking, sem færði bandarískum borgurum heim sanninn um það hversu óöruggir þeir eru í raun og veru. Og það kemur sér vel, einkum fyrir þann sívaxandi fjölda frjálshyggjusinnaðra hagfræðinga, stjórnmálamanna og herfræðinga sem kalla eftir “NAFTA-víggirðingunni”, öryggissvæði umhverfis heimsálfuna sem teygir sig frá suðurlandamærum Mexíkó til norðurmarka Kanada.

Með víggirtu meginlandi er átt við bandalag ríkja sem taka saman höndum um að tryggja sér hagstæð viðskiptakjör gagnvart öðrum ríkjum, en sameinast svo um að verja ytri landamæri sín til að halda fólki frá þessum sömu ríkjum úti. En ef heimsálfum er full alvara með því að reisa slíkar víggirðingar, verður einnig að hleypa nokkrum fátækari ríkjum inn fyrir múrana, því einhver verður að sjá um skítverkin. Fyrirmyndin er fengin frá Evrópu, þar sem Evrópusambandið er að stækka til austurs með því að hleypa inn tíu fátækum Austur-Evrópuríkjum á sama hátt og það beitir stöðugt grimmilegri ráðstöfunum til að varna fólki frá enn fátækari löndum á borð við Írak og Nígeríu inngöngu.

Það þurfti atburðina 11. september til að Norður-Ameríka hæfist að alvöru handa við að víggirða sig. Eftir árásirnar var það ekki lengur valkostur fyrir Bandaríkin að byggja bara hærri múra við landamærin að Kanada og Mexíkó; efnahagslífið hefði einfaldlega ekki liðið slíkar aðgerðir innan NAFTA-svæðisins. Til að mynda heldur stórfyrirtækið General Motors því fram að það tapi um það bil 650.000 Bandaríkjadölum á hverri mínútu sem bílafloti þess tefjist á kanadísku landamærunum.

Á hinum landamærunum treysta fjölmargir geirar atvinnulífsins, allt frá landbúnaði til byggingariðnaðarins, á “ólöglegt” vinnuafl frá Mexíkó. Þessari staðreynd gerir George Bush sér grein fyrir, því hann veit að næst á eftir olíu er það innflutt vinnuafl sem knýr áfram efnahagslífið í suðvesturríkjunum. Ef hann stöðvaði flæði þess, myndu fyrirtækin rísa öndverð upp. Hvað er þá til ráða fyrir ríkisstjórn sem þjónar hagsmunum atvinnurekenda en er með öryggi og eftirlit á heilanum?

Svarið er einfalt: flytjum landamærin. Breytum landamærunum að Mexíkó og Kanda í fínar eftirlitsstöðvar og lokum gjörvallri heimsálfunni frá Guatemala til Norðurheimskautsins. Embættismenn Bush-stjórnarinnar hafa ekki hátt um víggirta meginlandið, heldur kjósa þeir að nota hugtök á borð við “hið gagnkvæma trúnaðarumdæmi Norður-Ameríku”. En í raun er ekki verið að koma öðru á legg en öryggissvæði sem lýtur stjórn Bandaríkjanna.

Síðustu misserin hafa stjórnvöld í Washington þvingað Kanada og Mexíkó til að breyta lögum sínum um flóttafólk, fólksflutninga og vegabréfsáritanir til samræmis við stefnu Bandaríkjanna. Í júlí 2001 kynnti Vicente Fox, forseti Mexíkó, nýja og stórfellda öryggisáætlun við suðurlandamæri landsins, sem sérfræðingar í fólksflutningum hafa kosið að kalla syðri mörk bandarísku landamæranna. Í samræmi við áætlunina hafa stjórnvöld í Mexíkó vísað úr landi hundruðum þúsunda, einkum fólki frá Mið-Ameríku sem tekið hafði stefnuna á Bandaríkin. Bandaríkjastjórn sá að mestu um að fjármagna þessar aðgerðir. Sem dæmi um þetta má nefna atvik frá því í fyrra þegar mexíkóskir varðmenn handtóku hóp indíána sem hugðust fara til Bandaríkjanna og fluttu þá í niðurníddar flóttamannabúðir í Guatemala þar sem stjórnin í Washington greiddi kostnaðinn (átta og hálfan dal á dag fyrir hvern fanga).

Fox forseti batt vonir við að verða launað fyrir að gæta hinna óopinberu landamæra Bandaríkjanna í suðrinu og bjartsýni hans virtist ekki ástæðulaus. Ekki þarf að leita lengra aftur en til 6. september 2001, en þá hét Bush forseti því að færa stöðu u.þ.b. 4,5 milljóna Mexíkóbúa sem búa ólöglega í Bandaríkjunum “í eðlilegt horf”. Eftir 11. september hefur staða þessa vinnuafls hins vegar orðið enn ótryggari.

Þetta leiðir okkur að öðru sem tengist víggirtum meginlöndum; því þó það að vera innan þeirra sé betra en að vera utangarðs, felst ekki í því trygging um jafna stöðu. Washington er að koma upp nokkurs konar lagskiptum landamærum þar sem Bandaríkin fara með úrskurðarvaldið, Kanada og Mexíkó eru verðir og mexíkóskt verkafólk verður að halda sig á svæðum sem svipar til hjúaálmunnar á gömlum herragörðum.

Innan evrópsku víggirðingarinnar eru Frakkland og Þýskaland aðallinn, Spánn og Portúgal eru varðmennirnir. Pólland, Búlgaría, Ungverjaland og Tékkland eru eins og ánauðugir bændur á þessum postmódernísku tímum, sem leggja til láglaunaverksmiðjur þar sem föt, rafmagnstæki og bílar eru framleiddir fyrir 20-25% af því sem kosta myndi að framleiða þennan varning í Vestur-Evrópu.

Á sama tíma hafa gróðurhúsin geysistóru á sunnanverðum Spáni hætt að ráða Marokkóbúa til að tína jarðarberin. Þess í stað fela þau Pólverjum og Rúmenum með hvítt litaraft þessi störf, á sama tíma og hraðbátar búnir innrauðum skynjurum gæta strandlengjunnar og handsama skip frá Norður-Afríku. Evrópusambandið er í vaxandi mæli að skilyrða viðskiptasamninga sína með sáttmálum um “heimsendingu á fólki”. Við tökum við vörunum ykkar, segja Evrópubúar við ríki Suður-Ameríku og Afríku, svo fremi að við getum sent ykkur aftur fólkið ykkar.

Við erum að verða vitni að raunverulega nýrri “nýrri heimsskipan” – skipan sem er mun Darwinískari en skipting Jarðar í fyrsta, annan og þriðja heiminn. Nýja skiptingin er milli þeirra meginlanda sem eru víggirt og þeirra sem eru það ekki. Þau svæði sem eru utan múranna fá ekki einu sinni að leggja til ódýrt vinnuafl. Þeirra hlutskipti er að sitja utangarðs og betla eftir ófullnægjandi greiðslum fyrir hveiti og banana.

Innan víggirtu meginlandanna hefur nýrri félagsgerð verið komið á til að koma skikki á hina mótsagnakenndu forgangsröð sem komist hefur á eftir 11. september. Hvernig er unnt að hafa í senn þéttriðið landamæranet en hafa á sama tíma aðgang að ódýru vinnuafli? Hvernig er hægt að auka umsvifin fyrir viðskiptalífið en sætta á sama tíma kjósendur sem eru andsnúnir innflytjendum? Hvernig er hægt að opna fyrir fyrirtækin en loka á fólk? Það er einfalt – fyrst víkkarðu út svæðið. Síðan skellirðu í lás.
Naomi Klein

2003-01-22T21:10:00.000Z
þetta er tekið af Mútnum, þetta eru góð svör við helstu "rökum" hernaðarsinna varðandi Írak:

1. Það þarf að frelsa Íraka undan ógnarstjórn Saddams Husseins.

Já, vissulega er Saddam Hussein hið mesta illmenni sem á helst engu að stjórna, hvað þá heilu landi. En leiðin til að koma honum frá er ekki að hefja stríð sem bitnar fyrst og fremst á saklausum borgurum. Þá má minna á að seinast þegar CIA „frelsaði“ Írak þá greiddu þeir götu þess sama Saddams til valda. Það var árið 1963 og þegar hefur verið fjallað um það á Múrnum. Meðal annarra þjóða sem Bandaríkjamenn hafa „frelsað“ eru Chile en bylting herforingja þar kostaði ófá mannslíf og langvinna ógnarstjórn fyrir nokkrum árum. Og barátta Bandaríkjanna fyrir frelsi Afgana hafði um hríð í för með sér beinan og óbeinan stuðning við Talibana sem hún „frelsaði“ Afgana svo aftur undan nokkrum árum síðar. Ef einhvern lærdóm má draga af sögunni þá er hann sá að tilraunir Bandaríkjanna til að innleiða frelsi og lýðræði í fjarlægum löndum hafa undantekningalítið í för með sér ófrelsi, kúgun og neyð.

2. Lýðræðisþjóðum ber siðferðisleg skylda til að knésetja harðstjórana.

Segir hver? Bandaríkjastjórn? Sem hefur oftar en einu sinni steypt lýðræðislega kjörinni stjórn erlendis með ofbeldi? Sem reyndi seinast í fyrra að leika þann leik í Venezuela? Sem studdi leynt og ljóst við bakið á Pinochet, Stroessner, Videla, Mobutu, Suharto, Siad Barre, Marcos, Íranskeisara, aðskilnaðarstjórninni í Suður-Afríku, herforingjastjórninni í Grikklandi — og þannig mætti lengi telja. Að ógleymdum sjálfum Saddam Hussein.

3. Við megum ekki láta undan kúgunum.

Hvaða kúgunum? Hver er að kúga hvern? Hvað hefur Saddam Hussein gert á hlut okkar í þessum heimshluta? Hefur hann hótað okkur? Ætlar hann að ráðast á okkur? Nákvæmlega hvert er tilefnið til árásar á Írak? Vissulega er Saddam harðstjóri en hann hefur látið nágrannana í friði í tólf ár núna.

4. Það á ekki að semja við harðstjóra. Ef menn láta undan strax þá gjalda menn síðar.

Öðru nafni „Münchenarrökin“. Á þessum vef hafa þau oft og einatt verið rakin. Samningar Chamberlains og félaga við Hitler voru á engan hátt hliðstæðir við ástand mála nú. Saddam Hussein gerir engar landakröfur, frekar en Íran eða Norður-Kórea. Eina sem við gætum „látið undan“ Saddam með væri að hætta að svelta þjóð hans til bana, hætta að gera reglulegar loftárásir á landið og hætta að hóta innrás í Írak. Á hvern hátt er það sambærilegt við það þegar Chamberlain og Daladier afhentu Hitler hluta Tékkóslóvakíu?

5. Gereyðingarvopn Saddams ógna heimsfriðnum.

Þetta eru mest notuðu rökin. En hvaða gjöreyðingarvopn? Þau hafa engin fundist og helstu sérfræðingar, menn á borð við Scott Ritter, telja að þau séu ekki til. Engin sönnunargögn sem menn þora að sýna almenningi benda til þess. En tvískinningurinn er raunar algjör því að engum dettur í hug að ráðast á Norður-Kóreu þó að það sé miklu líklegra að Norður-Kóreumenn eigi slík vopn. Og þó ekki mjög líklegt. Kínverjar eiga sannanlega gereyðingarvopn og í Kína er ekki lýðræði. Samt dettur engum í hug að þeirra vopn ógni heimsfriðnum. Og hvað með vopn Bandaríkjamanna sjálfra? Eru þeir ekki eina þjóðin sem um þessar mundir fer um með hótunum um árásir og stríð? Hafa þeir ekki margsagt að þeir útiloki ekki beitingu gereyðingarvopna?

6. Einræðisherrar eru ógn við heimsfriðinn.

Ja, þessu má halda fram en enginn einræðisherra leggur í meiri ófrið en hann telur sig ráða við. Og það er ekki einræðisherrann Saddam Hussein sem er að ógna neinum. Þvert á móti er það Bandaríkjastjórn og leppur hennar Blair sem eru stöðugt með hótanir þessa dagana. Og hver bjó til flesta einræðisherrana? Þar á meðal Saddam Hussein? Af hverju ætti fólk að gína við svona rökum frá ríkisstjórn sem hefur þjálfað einræðisherra og morðsveitir um allan heim, þar á meðal sjálfan Usama Bin Laden?

7. Mikilvægt er að halda samstöðu heimsins í baráttunni við hryðjuverk.

Hvaða hryðjuverk? Þó að Saddam Hussein sé fauti og morðvargur er hann ekki hryðjuverkamaður í hefðbundnum skilningi þess orðs, ekki fremur en hinir vinir Bandaríkjanna gegnum tíðina. Og hvaða þrugl er þetta um samstöðu heimsins? Núna er staðreyndin sú að enginn styður stríð gegn Írak nema Ísrael og Bandaríkin og þær stjórnir sem telja það þjóna sínum hagsmunum best að styðja Bandaríkjamenn til hvaða hermdarverka sem er, með hina aumu ríkisstjórn Íslands þar í broddi fylkingar.

8. Saddam beitti efnavopnum gegn þjóð sinni.

Jú, það gerði hann og það var gegn Kúrdum. Og þá studdu Bandaríkjamenn hann af ráðum og dáð enda var hann þá helsti andstæðingur klerkastjórnarinnar í Íran. Saddam beitti efnavopnunum einmitt gegn hópi Kúrda sem börðust með Írönum og naut alltaf stuðnings Bandaríkjanna í því stríði. Fyrir stríðið gegn Íran og síðar Kuwait gengu Írakar úr skugga um að þeir nytu stuðnings eða að minnsta kosti vinsamlegs hlutleysis Bandaríkjastjórnar. En hafa ekki fleiri kúgað Kúrda? Jú, það hafa Tyrkir gert en þeir sitja einmitt við háborðið í NATO, eru miklir vinir Bandaríkjamanna og ætla að aðstoða þá við innrás í Írak. Og þeir hafa fangelsað skæruliða Kúrda, eins og Öcalan. Menn sem Bandaríkjamenn og aðrir hafa einmitt stimplað hryðjuverkamenn. Það rekur sig nefnilega hvað á annars horn í hinni siðrænu utanríkisstefnu Bandaríkjastjórnar.

9. Það má ekki láta Saddam Hussein komast upp með vopnaeign.

Ekki er því að leyna að illt er að sjá vopn í höndum slíkra kóna. En hvaðan hefur Saddam Hussein fengið sín vopn? Eru þau öll búin til í Írak? Hvaðan fékk hann tæki og efni í efnavopnin sem hann átti forðum? Staðreyndin er nefnilega sú að Saddam Hussein er gamall vinur Vesturlanda, rétt eins og allir vinirnir sem núna er verið að dæla vopnum til út um allan heim. Væri ekki nær að stöðva þann bisness en að myrða Íraka í hrönnum?

10. Árásin á New York kallar á sókn gegn hryðjuverkum.

Sókn gegn hverju? Seinustu mánuði hafa Bandaríkjastjórn og fylgiríki þeirra hafið mikla „sókn“ gegn hryðjuverkum, skert mannréttindi, aukið vígbúnað og fært Vesturlönd einu skrefi nær fasismanum. Og hvaða árangri hefur verið náð? Usama Bin Laden slapp og leikur lausum hala. Engum dettur í hug að hann sé í Írak. Talibanaleiðtoginn sjálfur stakk af á mótorhjóli. Þúsundir Afgana voru drepnar og enn fleiri sveltir og fangelsaðir. Og til hvers? Öryggið í heiminum hefur minnkað en ekki aukist. Því að ógnin við það er sá jarðvegur sem hryðjuverkin spretta úr. Og Bandaríkjamenn, Vesturlönd og Ísrael hafa keppst við að sá í þann jarðveg seinustu misseri.

2003-01-22T20:52:00.000Z
loksins loksins er tölvan komin upp heima hjá mér. annars er ég búinn að vera veikur í dag. ég held að mér hafi slegið niður í gær.

2003-01-21T09:06:00.000Z
ég skil ekki þá vitleysu að það séu til fleirri en ein tegund af rafmagnsklóm. þetta er nefnilega ástæðan fyrir því að netið er ekki enn komið upp heima hjá mér. en það lagast í dag

2003-01-17T12:41:00.000Z
puff puff puff
ég fór í ráðhúsið í gær til að mótmæla kárahnjúkavirkjun. það var gaman að sjá fólk mæta á svæðið og styðja gott málefni. ég fór inn á pallana þegar umræðan var í gangi og hlustaði gaumgæfilega. eftir að mjög margir, og þar á meðal ég, voru búnir að vera með frammíköll og allir voru búnir að klappa púa eða hlæja þá fannst lögreglunni nóg ver komið því að það komu óeinkennisklæddir lögreglumenn og gengu beint upp að einum gestanna, jónsa, og gripu hann. hann var ekki búinn að vera verstur þarna inni og má geta að ég var mun verri en þeir tóku hann. ég greip í hann og reyndi að halda honum inni en þá sló einlöggan í hendina á mér og önnur hrinti mér þetta var mjög spes lögreglufasismi.

2003-01-14T12:46:00.000Z
úff þetta kom ekki vel út

Disorder Rating
Paranoid: High
Schizoid: Very High
Schizotypal: Very High
Antisocial: High
Borderline: Moderate
Histrionic: Moderate
Narcissistic: High
Avoidant: High
Dependent: Moderate
Obsessive-Compulsive: High

-- Click Here To Take The Test --

2003-01-14T12:30:00.000Z
ég vil biðja fólk afsökunar á því að ég er ekker´t búinn að blogga að undanförnu. það er nefnilega þannig að ég var að flytja um helgina og síminn vareitthvað í rusli út af því og þess vegnha er ég ekki búinn að vera neitt á netinu

2003-01-10T13:40:00.000Z
jájá skólinn er búinn í dag. ég er enn að leita að einhverju góðu partíi fyrir kvöldið

2003-01-09T23:44:00.000Z
ég var að horfa á Jay Leno og þar voru hjón sem voru búin að vera gift í 75 ár það er töff

2003-01-08T23:45:00.000Z
úff er í miðjum heimadæmum þau eru frekar strembin en þetta hlýtur að blessast allt saman

2003-01-08T13:44:00.000Z
heimurinn
hvert stefnir heimurinn í dag? ég er búinn að vera að pæla hvort 3ja heimsstyrjöldin sé í uppsigi því ef maður ber saman það sem gerðist rétt fyrir fyrstu heimsstyrjöldina þá er margt sem er mjög keimlíkt. stórveldi eu í vígbúnaðarkapphlaupi á fullu og einmitt eru tvær heitar deilur í gangi. í byrjun aldarinnar voru deilurnar á milli breta og þýskalands og á milli austurríkis-ungverjalands og serba. nú er það Bna versus írak og norður kórea og svo ísrael versus palestína. það eina sem ég veit með vissu er það að mannkynið lærir ekki af sögunni og þess vegna er maður svo hræddur um það að það þurfi ekkert meira og stærra en tvö skot í sarajevó eins og forðum.

2003-01-08T13:32:00.000Z
ég er í skólanum ákkurat núna. ég er reyndar búinn í tímum en hér hangi ég í einhverju móki

2003-01-07T22:04:00.000Z
ég er eitthvað að verða gamall eða eitthvað því undanfarna daga hef ég ekki getað haldið mér vakandi lengur en til svona hálf ellefu. ég er einmitt að drepast úr þreytu þannig að ég nenni ekki að skrifa eitthvað sem skiptir öllu máli.

2003-01-06T21:08:00.000Z
mmmmmmm....
eins og ég sagði áðan þá er áskell kominn aftur sem er tóm gleði og í til efni af komu sinni þá eru 37 dæmi heima fyrir morgundaginn, ahhh.. nú man ég af hverju ég er á þessarri deild

2003-01-06T20:59:00.000Z
ég skil ekki af hverju íslendingar þurfa að eyðileggja allt. mér finnst voða gaman þegar íslendingar sprengja allt á gamlárs en að þurfa að gera það svo aftur 6 dögum seinna bara af því að það eru 13 dagar frá því að jólin voru, það er bara fáránlegt

2003-01-06T14:35:00.000Z
fyrsti skoladagurinn eftir jolafri er nu a enda. hann var agaetur ad mestu leiti en frabaer ad einu leiti. Meistari Askell er kominn aftur og staerdfraedin farin a fullt. thessi tolva vill ekki skrifa islenska stafi eg vona ad thetta skiljist.

2003-01-05T18:04:00.000Z
það var einnig að koma í ljós áðan að ég er að fara að flytja í fellsmúlann og verð þar með nágranni Einars og Gvends

2003-01-05T18:00:00.000Z
Þvílík snilld!!!
leik Wolverhamton og Newcastle var að ljúka og þetta var án efa einhver besti leikur sem ég hef séð í langan tíma hann hafði allt. Wolverhampton vann 3-2 og spiluðu bæði liðin frábæran bolta. það vantar meira af þessu. annars unnu Liverpool áðan sem er gott og vona ég að þeir fari nú að sýna sitt rétta andlit á ný.

2003-01-05T13:59:00.000Z
nú er hálfleikur í leik Man. City og Liverpool, staðan er 0-0 en þó eru Liverpool menn búinir að vera betri

2003-01-04T18:33:00.000Z
Þessi grein birtist á Múrnum og finnst mér hún helvíti skýrt dæmi um það hvernig BNA menn mistúlka sögunna á þann hátt að þau gildi sem að BNA menn berjast fyrir í dag séu þau sem grundvölluðu stofnun BNA manna þegar 56 menn settu nafn sitt á sjálfstæðisyfirlýsinguna árið 1776. Nú reka BNA menn heimsvaldastefnu og styðja önnur ríki sem styðja jafnvel enn skýrari heimsvaldastefnu eins og Ísrael, þegar BNA voru stofnuð var það gegn imperialisma Breta. einkennilegt? og nú berjast BNA menn fyrir því að stórfyrirtæki fái að ráða meiru en einstaklingurinn. Þetta gera þeir með því að vera helstu hvatamenn að ýmsum fríverslunar samningum og stofnunum eins og NAFTA, WTO, IMF og fleirum. Þegar BNA menn voru stofnuð þá voru menn að berjast fyrir frelsi einstaklingsins gegn stórfyrirtækjum Breta og þetta stendur skýrt í sjálfstæðisyfirlýsingunni. Það eina sem BNA menn berjast fyrir enn þann dag í dag sem þeir hafa alltaf barist fyrir það er þrælahald. þrátt fyrir að þeir hafi afnumið það 1864 þá eru þeir enn að styðja ríki sem halda þræla og enn eru bandarísk fyrirtæki sem þrælka út börnum svo að svínin í vestri geti verslað hlutina frekar ódýrt.

hér kemur greinin

Styttist í nýtt teboð?

3.1.2003

Maður er nefndur Robert B. Zoellick. Hann er efnahagsmálaráðunautur í ríkisstjórn George W. Bush Bandaríkjaforseta og er helsti talsmaður stjórnarinnar í málum sem tengjast alþjóðlegum viðskiptasamningum. Á löngum ferli sínum hefur hann komið víða við, þ.á.m. í tengslum við stofnun NAFTA og undirbúning Doha-ráðstefnu Alþjóðaviðskiptastofnunarinnar.

Fyrir tæpum mánuði síðan ritaði Zoellick grein í The Economist, tímarit sem hefur einhverra hluta vegna nánast öðlast sess heilagrar ritningar í hugum sumra íslenskra hægrimanna. Í greininni mærir Zoellick viðskiptastefnu Bandaríkjastjórnar og stuðning hennar við fríverslun í heiminum. Kýs hann að rekja þessa stefnu allt til “teboðsins í Boston” árið 1773, þegar hópur amerískra sjálfstæðissinna henti tefarmi Breska Austur-Indíafélagsins í sjóinn.

Gott er til þess að vita að sá siður að leita liðsinnis löngu liðinna manna í pólitískum deilum sé ekki bundinn við Ísland. Það er því ekki nóg með að Njáll á Bergþórshvoli sé Framsóknarmaður og Jón Sigurðsson forseti hlynntur Evrópusambandinu, heldur naut ríkisstjórn Bush forseta umtalsverðs stuðnings meðal Samuels Adams og samferðamanna hans á átjándu öldinni.

Raunar þarf Zoellick að beita enn svakalegri sagnfræðilegum loftfimleikum til að eigna sér tespellvirkjana frá Boston en kollegi hans Guðni Ágústsson til að afla sér stuðningsmanna frá þjóðveldisöld. Í það minnsta er vandséð hvernig finna má beina tengingu milli teboðsins margumrædda og sendinefnda Bandaríkjanna hjá alþjóðlegum viðskiptastofnunum.

Hvað gekk aftur frjálsræðishetjunum góðu til með því að henda öllu þessu tei í sjóinn? Rifjum þá sögu aðeins upp:

Samuel Adams og félagar voru ekki að mótmæla tollum og höftum. Ástæða andófsins var þvert á móti niðurfelling breskra stjórnvalda á tetollum og tilraunir til að hleypa Breska Austur-Indíafyrirtækinu inn á Ameríkumarkaðinn, fram hjá heimamönnum, í nafni frjálsra viðskipta. Teboðið í Boston var því tilraun til að verjast stórfyrirtæki sem reyndi að gleypa markaðinn. Með góðum vilja mætti jafnvel túlka það sem andóf gegn alþjóðavæðingu á forsendum fjármagnsins – finni menn sér fróun í að kalla löngu látnar persónur úr sögunni til stuðnings tilteknum málstað.

En því miður verður Robert B. Zoellick uppvís að fleiru en vondri sagnfræði í grein sinni. Málflutningur hans einkennist af gríðarlegri hræsni ríkisstjórnar sem í anda harðsvíraðs merkantílisma krefst fríverslunar af öðrum en skirrist ekki við að beita verndarstefnu heima fyrir.

Tvöfeldni þessi kemur best í ljós á sviði landbúnaðarmála. Tökum sem dæmi framleiðsluna á baðmull. Árið 2001 vörðu stjórnvöld í Bandaríkjunum fjórum milljörðum dala í styrki, niðurgreiðslur og útflutningsbætur til 25.000 plantekra í Suðurríkjunum. Þessar tölur er geysiháar, einkum þegar haft er í huga að heimsmarkaðsvirði baðmullarframleiðslunnar er ekki nema þrír milljarðar.

Í ljósi þess að Bandaríkin eru helsti baðmullarútflytjandi í veröldinni er ljóst að áhrif þessara niðurgreiðsla eru mikil í samkeppnislöndunum. Í Vestur-Afríku er áætlað að um ellefu milljónir heimila byggi afkomu sína á baðmullarræktun. Niðurgreiðslur Bandaríkjamanna þýða að beint tap þessara samfélaga er um 200 milljónir Bandaríkjadala á ári, en það er margfalt hærri fjárhæð en þetta svæði fær í þróunaraðstoð frá Bandaríkjunum eða í niðurfellingu skulda samkvæmt áætlun þeirri sem leiðtogar helstu iðnríkja heims stæra sig svo mjög af.

Zoellick hreykir sér af því að það sé stefna Bandaríkjastjórnar að stórlega skuli dregið úr niðurgreiðslum í landbúnaði og tollar felldir niður á sem flestum sviðum. Veruleikinn er hins vegar sá að þegar Bush-stjórnin samþykkti nýja landbúnaðarstefnu um mitt síðasta ár, voru niðursgreiðslur og útflutningsbætur auknar um 10%. Og ekki þolir bandarísk tollastefna mikið betri skoðun, því hún beinist sérstaklega gegn ríkjum þriðja heimsins. Það segir sína sögu að tolltekjur Bandaríkjastjórnar af innflutningi frá Bangladesh séu þær sömu og af innflutningi frá iðnríkinu Frakklandi.

Gagnrýni af þessu tagi svara bandarísk stjórnvöld með því að benda á áætlanir til niðurfellingar tolla frá fátækustu ríkjum heims, svo sem AGOA-áætlunarinnar (African Growth and Opportunity Act). En meira að segja hún reynist haldlítil, enda er tollaniðurfellingin skilyrt með því að rekstrarvörur séu bandarískar og að heimaaðilum standi ekki ógn af samkeppninni.

Bandaríki Zoellicks eru því ekki frábrugðin Bretlandi nítjándu aldar sem neytti aflsmunar til að tryggja drottnunarstöðu sína á mörkuðum heimsins, nema í stað fallbyssubáta hennar hátignar beita Bandaríkin og Evrópusambandið fyrir sig alþjóðastofnunum á borð við Alþjóðaviðskiptastofnuna og Alþjóðabankann. Þess kann að vera skammt að bíða að teboðið í Boston verði endurtekið í öðrum höfnum veraldarinnar, en líklega verður Robert Zoellick þá undrandi að uppgötva í hvoru liðinu hann verður.

2003-01-04T16:02:00.000Z
ég eldaði geðveikt góða grænmetissúppu handa mér og pabba í hádeginu. hér er uppskriftin: (n.b. þetta er mín uppskrift)
sveitasæla ala Grétar
3 meðalstórar gulrætur
1 stór laukur
1 dós af nýrnabaunum í saltvatnslegi
1 dós af tómötum, skornum e.diced
2 hvítlauksrif
1 lítri af grænmetissoði, ég mæli með því að nota tvo grænmetisteninga í 1 líter af vatni
ferskt timjan, salt og pipar.
ólívuolía.

byrjað er á því að sneiða gulræturnar og skera laukinn í smátt. þetta er steikt uppúr smá olíu í potti á lágum hita og þessu leyft að mýkjast aðeins. því næst er hvítlaukurinn kraminn út í og þeeu öllu leyft að krauma í smá stund í viðbót. næst skal bæta við nýrnabaununum með safanum og tómötunum út í. því næst er soðinu og timjaninu bætt út í og hiti hæjjaður þangað til suða kemur upp. þegar suðan er komin þá á að lækka hitann og láta malla þangað til súpan er tilbúin. það gæti tekið svona hálftíma en annars er það bara eitthvað sem að maður ákveður með munninum. saltist og piprist eftir smekk.

gjöriðisvovel

2003-01-04T15:52:00.000Z
nú er hálfleikur í leik Leeds og Scunthorpe á stöð2. Leeds eru yfir 1-0 en það er algjörlega gegn gangi leiksins því Sc eru búinir að vera drullugóðir. það er líka voða spes að hann Gaupi sem er að lýsa leiknum getur ekki sagt Smith, hann segir alltaf alan smitt, úff vond enskukunnátta

2003-01-03T19:11:00.000Z
mikil snilld

2003-01-03T19:04:00.000Z
ég bið lesendur mína að afsaka þessa bloggþurð sem er búin að vera hjá mér að undanförnu. ég er aðallega búinn að ver sofandi undanfarna daga

2003-01-02T02:03:00.000Z
ég var að vakna eftir aðfarir áramótanna. ég skemmti mér mjög vel alveg eins langt og ég man

Disorder	Rating
Paranoid:	High
Schizoid:	Very High
Schizotypal:	Very High
Antisocial:	High
Borderline:	Moderate
Histrionic:	Moderate
Narcissistic:	High
Avoidant:	High
Dependent:	Moderate
Obsessive-Compulsive:	High
-- Click Here To Take The Test --